Tiranë: 13 mijë euro për fanellën e Ronaldinhos

[justify][b]Tiranë: 13 mijë euro për fanellën e Ronaldinjos[/b]


[url=http://www.shqipmedia.com/2008/10/13-mije-euro-per-fanellen-e-ronaldinjos/#respond][img(230px,230px)]http://www.shqipmedia.com/wp-content/uploads/2008/10/ronaldinho.gif[/img][/url]
Vetëm për të bërë pronë të vetën fanellën, me të cilën Ronaldinjo
luajti për herë të parë në stadiumin “Qemal Stafa” të Tiranës, një
shqiptar ka nxjerrë nga xhepi plot 13.000 euro.
Bluza e kampionit brazilian është vendosur në shitje gjatë një ankandi
të zhvilluar në mbrëmjen e së martës, pas përfundimit të ndeshjes
Tirana-Milan. Gjithçka ka ndodhur në një nga sallat e hotel “Sheraton”,
me ideimin e “Taçi Oil” dhe nën mbështetjen e UNICEF. Qëllimi ka qenë
përfitimi i fondeve, që do të jepen në bamirësi për fëmijët në nevojë.
Kështu, vetëm përmes fanellës së tij, Ronaldinjo ka realizuar një
tjetër “gol”, shumë më të rëndësishëm se ai që shënoi në miqësoren
përballë bardhebluve dhe që u duartrokit nga mijëra tifozë të pranishëm
në stadium. Mësohet se blerësi, që ka arritur të sigurojë “80″-n kuqezi
ka qenë një biznesmen, emri i të cilit nuk është bërë i ditur.
Megjithatë, fare lehtë mund të merret me mend se është një tifoz i
Milanit dhe veçanërisht i kampionit brazilian, përderisa ka qenë i
gatshëm të bëjë një “çmenduri” të tillë.
[b]Refuzimi[/b]
Në këtë mënyrë është zbuluar arsyeja e refuzimit, që i bëri Ronaldinjo
kërkesave të shumta që i kanë ardhur në përfundim të 90 minutave të
luajtura kundër Tiranës. I pari që shkoi në drejtim të tij ishte
pikërisht njeriu i sfidës së të martës, Gjergji Muzaka, i cili donte të
shkëmbente fanellën e tij me atë të brazilianit, por më kot ka
ngulmuar. Asi i Milanit mesa duket ishte porositur që të mos e
lëshonte, sepse pas ndeshjes “80″-a e tij do të përfundonte në ankand,
aty ku si përfundim do të merrte më shumë vlerë se fanella e Muzakës,
që mund të kishte marrë në këmbim. Në këtë situatë, edhe qëndrimi i tij
prej gati 10 orësh në kryeqytetin tonë ka shërbyer jo vetëm për
kënaqësinë futbollistike të miliona sportdashësve shqiptarë, por edhe
për përmbushjen e një misioni që shkon përtej sportivitetit.
[b]Të tjerë[/b]
Përveç asaj të Ronaldinjos, nga zyrat e kompanisë “Taçi Oil” bëhet e
ditur se në ankandin e të martës janë shitur edhe fanella të tjera të
lojtarëve të njohur të Milanit. Mbi të gjitha ka rënë në sy shitja e
numrit 3 të kapitenit Paolo Maldini për vlerën e 7500 euro. Gjithashtu,
bluza e Emersonit ka kapur vlerën e 850 eurove, ndërsa ajo e Luka
Antoninit 500 euro. Në këtë të ashtuquajtur “mbrëmje gala” kanë marrë
pjesë edhe drejtues të klubit kuqezi të Milanit, nga ata që erdhën për
të shoqëruar skuadrën në Tiranë, si Franko Barezi e Daniele Masaro. Të
tjerë protagonistë që i kanë dhënë të martës më shumë vlera, për të
qenë një ditë e paharrueshme.
[b]UNICEF[/b]
Legjendarët e futbollit AC Milan janë bashkuar në një ndeshje bamirësie
me skuadrën e Tiranës në stadiumin “Qemal Stafa”, për të ngritur fonde
për të mbështetur projektin “Shqipëria lexon”, një iniciative që
mbështet që çdo shkolle publike të ketë një bibliotekë si dhe të
promovojë kulturën e leximit në fëmijët e shkollave. Fale kontributit
të AC Milan, UNICEF dhe partnerët e tij janë angazhuar në hapjen e 100
bibliotekave në shkolla të tjera.
[b]Inzagi “mallkon” Nallbanin[/b]
Qendërsulmuesi i Milanit, Inzagi, ka shumë mundësi të humbasë ndeshjen
kundër Sampdorias. Pipo u dëmtua gjatë ndeshjes kundër Tiranës pas një
përplasje me portierin Nallbani. Lajmin e jep agjencia italiane “Agi”.
I vështirë është edhe rikthimi i Nestës, pavarësisht se ky i fundit
luajti për shumë minuta kundër bardhebluve shqiptarë. Ronaldinjo, i
cili dëshmoi formë të mirë fizike e shënoi një gol të merituar do të
jetë kundër Sampdorias.
[b]Shevçenko: Lidhem mirë me Dinjon[/b]
Megjithë figurës së shëmtuar, me të cilën Milani u shfaq në Shqipëri,
Shevçenko është i kënaqur. “Tjetër humbje në miqësore? Për mua ka
rëndësi marrëveshja me Dinjon, që po shkon gjithmonë e më mirë.
Gjithashtu jam i gëzuar sepse forma ime po përmirësohet gjithmonë e më
shumë. Pas paraqitjes së mirë që bëra me Kombëtaren, në Tiranë luajta
një ndeshje me ritëm të kënaqshëm”.
[b]Eurogoli, Muzaka është në ëndërr[/b]
Përballja dhe triumfi ndaj ekipit kampion bote për klube, Milanit dhe
një eurogol i realizuar prej tij, kanë bërë që Gjergji Muzaka, për një
natë të vetme të ‘prekë qiellin me dorë’. “Nuk e kisha ëndërruar kurrë
që një ditë do të luaja përballë Milanit, për të cilën bëj tifo të
zjarrtë. Imagjino si jam ndjerë mbrëmjen e së martës që jo vetëm jam
ndeshur me kuqezinjtë legjendarë, por edhe kam realizuar një eurogol”.
[b]Daliç: Tirana, e frikshme[/b]
Trajneri i Dinamos, Zllatko Daliç, nuk ka munguar të martën në mbrëmje
në stadiumin kombëtar “Qemal Stafa”, kur së bashku me ndihmësin e tij,
Artan Mërgjyshi, ka vëzhguar ndeshjen Tirana-Milan. “Ka luajtur në të
gjitha drejtimet shumë mirë. Ishte e vendosur mirë taktikisht dhe në të
tilla kushte, diti t’i përgjigjej Milanit me yjet e futbollit botëror
në fushë. E gjithë skuadra ishte perfekte, kur gjashtë futbollistët
ishin më shumë se në lartësinë e duhur”.
[b]Lufta e tifozëve në forume[/b]
Humbja e Milanit në Tiranë nuk ka ndezur aq bujë në shtypin italian
sesa në rang tifozerish. “Galiani ka konfirmuar blerjen e re, duke parë
që Abiati mbeti si një mumje në golin e dytë të Tiranës. Bëhet fjalë
për një portier të ri shqiptar, që do të bëhet numri 1 i ri i portës
kuqezi… Sali Bershia”, ka shkruar një prej tifozëve”. “Nëse je skuadra
e parë në botë, atëherë duhen fituar edhe këto miqësore. Milanit i
rrofshin trofetë”, ka qenë një tjetër mesazh.
[b]Media italiane kryqëzon Milanin[/b]
Mediat italiane i bënë një jehonë të madhe si pranisë së Milanit në
Shqipëri. Gazeta e njohur torineze “La Stampa”, një nga tre gazetat më
të mëdha në Itali pas “Corriere della Sera” e “La Repubblica”,
shkruante: “Milani doli i humbur me rezultatin 2-1, në ndeshjen e
vlefshme trofeun “Taçi Oil Albania Reads”, por objektivi teknik kryesor
ishte vlerësimi i gjendjes fizike i të rikthyerve Inzagi, Nesta e
Favali e Ronaldinjo.
[b]Galiani çmendet për lakrorin shqiptar[/b]
Edhe ai iu bashkua radhës së gjatë të personaliteteve që kanë
lëpirë gishtat për lakrorin tonë. Deri pas mesditën e së martës ai
dinte pak, për mos thënë aspak, për mikpritjen tonë dhe akoma më pak
për kuzhinën tipike shqiptare. Por një lakror me qepë e me mish, i
shoqëruar nga një verë prodhim tipik shqiptar, nën tingujt virtuozë të
violinës së mjeshtrit Fatos Qerimi, kanë lënë pa mend
zëvendëspresidentin e Milanit, Adriano Galiani.
Në fakt, sipas organizatorëve të Tirana-Milan, ajo drekë nuk ishte në
agjendën e dr. Galianit dhe u ruajt si një surprizë për mikun italian.
Kur i gjithë delegacioni sportiv i Milanit ishte në “Hotel Sheraton”,
Adriano Galiani dhe një grup i ngushtë i drejtuesve të Milanit,
shoqëruar edhe nga Franko Barezi e Daniele Masaro, kanë devijuar
agjendën e tyre për të drekuar në një lokal në periferi të Tiranës. Nuk
dihet nëse zv/presidenti i Milanit ka pranuar të drekojë te “Sofra e
Ariut”, pikërisht pse aty muaj më parë kishte shkelur edhe zonja e parë
e SHBA-së, Laura Bush, apo ka preferuar vërtetë një restorant tipik
shqiptar. Fakt është se nën shoqërinë e Rezart Taçit, presidentit të
kompanisë “Taçi Oil”, Galiani e ka mbajtur frymën pikërisht tek ky
restorant.
Intimiteti i stafit drejtues të Milanit është prishur nga rreth 30
gazetarët italianë që kanë shoqëruar ekipin kuqezi në Tiranë. Këta të
fundit nuk i janë shqitur administratorit të Milanit për asnjë çast
prej zbarkimit në tokën shqiptare dhe deri në orën 22:00, kur çarteri i
Milanit u ngrit sërish nga aeroporti i Rinasit. Edhe ata patën zbarkuar
në mjediset e “Sofrës së Ariut” jo më shumë për të shijuar kuzhinën
shqiptare, se sa për të kapur skupin e radhës, Galianin duke shijuar
një tip llazanje, sipas italianëve, por krejt gjë tjetër sipas
shqiptarëve. Edhe për këtë të fundit Numri 2 i Milanit gjeti kohë për
të ngritur një dolli me verë. Ndërsa nën vëzhgimin e rreptë të
kamerierëve, pjatat nga tavolina qendrore shkonin e vinin, teksa ai,
Galiani, nuk i ndahej lakrorit. Ndoshta po të mos ishte nën vesturën e
zv/presidentit të Milanit, nën shoqërinë e disa personaliteteve të
tjera në atë drekë dhe larg syve kureshtarë të mediave, Galiani do të
kishte paketuar ndonjë gjë edhe për zonjën e tij në Itali.
Vetëm takimi i programuar me kryeministrin Sali Berisha e pati detyruar
Adriano Galianin që të ngrihej nga tavolina. Agjenda e ngjeshur e
thërriste drejt Kryeministrisë, ku edhe aty mbeti goxha i shokuar nga
pritja kavaliereske e Berishës. Një fanellë me Nr. 1 dhe emrin e
Berishës pas, një koktej në Hotel Sheraton para konferencës për shtyp
me gazetarët dhe humbja ndaj Tiranës, gjithsesi nuk i shuan interesin
Galianit, i cili nuk e pati fshehur dëshirën për t’u kthyer sërish në
vendin që e ka çuditur pa masë, tek “Sofra e Ariut”.
[b]“Volksvagen” ndan donatorët, Milan mund të bojkotohej[/b]
Ndeshja mes Tiranës dhe Milanit mund të ishte anuluar vetëm në
minutat e fundit. E gjithë kjo mund të kishte ardhur si pasojë e
urdhrit që mund të lëshonte “in-extremis” ndonjë prej donatorëve, si
pasojë e konfliktit të brendshëm dhe degradues që ka nisur mes tyre.
Mësohet se gjithçka ka lindur përpara disa ditësh, në momentin kur
Tirana ka dalë në fotografi-posteri me rastin e ndeshjes së madhe. Në
këto çaste është shënuar një episod i papritur, kur shefi i klubit, Edi
Gjini (krahu i djathtë i Agron Papulit te Tirana) ka refuzuar t’i
bashkohet pjesës tjetër të stafit. Por ky nuk ka qenë një rast
sporadik, sepse konflikti ka vijuar më tej midis dy donatorëve, Halili
dhe Papuli. Ky i fundit ka ngulmuar që skuadra të luante ndaj Milanit
me sponsorin Volksvagen, kompani për të cilën ai ka ekskluzivitetin në
Shqipëri, të shkruar mbi fanellat bardheblu, ndërsa Refik Halili e ka
refuzuar një gjë të tillë, duke pretenduar se donatori Papuli nuk ka
kontribuar aspak financiarisht për Tiranën sivjet, dhe nëse dëshironte
të shfrytëzonte një shërbim të tillë reklame, duhej të paguante
detyrimin financiar dhe vetëm më pas çdo gjë ishte e mundur. Mania për
të treguar se kush është më i forti desh e bëri të pamundur zhvillimin
e ndeshjes dhe mësohet se madje është dashur ndërhyrja urgjente e vetë
kryetarit të Bashkisë së Tiranës, zotit Edi Rama, që gjithçka të
zgjidhej. Dhe në fund sponsori “Volskvagen” fitoi, pasi ai u shfaq në
fanellat e lojtarëve. Si për ta konfirmuar këtë ndodhi, një provë ishte
edhe mungesa e donatorëve Papuli dhe Nuri në stadium në momentet e
ndeshjes.


[b]Jepni komentin tuaj![/b][/justify]